စက်မှုကျွမ်းကျင် တစ်နှစ်သင်တန်း သင်တန်းဆင်းပွဲ

စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းသည် ယနေ့နံနက်ပိုင်းတွင် မကွေးတိုင်းဒေသကြီး မကွေးမြို့ရှိ အမှတ် (၅) စက်မှုသင်တန်းကျောင်း (မကွေး) ၌ ကျင်းပသည့်

အမှတ်စဉ် (၁၂) စက်မှုကျွမ်းကျင် တစ်နှစ်သင်တန်း သင်တန်းဆင်းပွဲအခမ်းအနားသို့ Virtual စနစ်ဖြင့် စက်မှုဝန်ကြီးဌာန ရုံးအမှတ် (၃၀) အစည်းအဝေးခန်းမမှ တက်ရောက်သည်။

အခမ်းအနားသို့ မကွေးတိုင်းဒေသကြီး ဝန်ကြီးချုပ် ဦးတင့်လွင်၊ အစိုးရအဖွဲ့ဝင် ဝန်ကြီးများ၊ စက်မှုပူးပေါင်းဆောင်ရွက်ရေးဦးစီးဌာန ညွှန်ကြားရေးမှူးချုပ်၊ တိုင်းဒေသကြီး/ ခရိုင်အဆင့် ဌာနဆိုင်ရာတာဝန်ရှိသူများ၊ ကျောင်းအုပ်ကြီးနှင့် နည်းပြ ဆရာ ဆရာမများ၊ သင်တန်းသား သင်တန်းသူများနှင့် မိဘများ၊ ဖိတ်ကြားထားသည့် ဧည့်သည်တော်များနှင့် စက်မှုဝန်ကြီးဌာနမှ တာဝန်ရှိသူများ တက်ရောက်ကြသည်။

ဦးစွာ ပြည်ထောင်စုဝန်ကြီးက သင်တန်းသားများအနေဖြင့် သင်တန်းကျောင်းမှ လေ့လာသင်ယူခဲ့ရသည့် အသိပညာ၊ အတတ်ပညာများကို စက်ရုံ၊ အလုပ်ရုံများတွင် ပြန်လည် အသုံးချပြီး နိုင်ငံအကျိုးကို တစ်တပ်တစ်အား ပါဝင်ဆောင်ရွက်ကြသည့် လူငယ်မောင်မယ်များ ဖြစ်လာစေရေး ကြိုးပမ်းဆောင်ရွက်ကြရမည်ဖြစ်ကြောင်း၊ ခေတ်မီဖွံ့ဖြိုးတိုးတက်သည့် နိုင်ငံတော်တည်ဆောက်ရာတွင် နိုင်ငံရေး၊ စီးပွားရေး၊ ပညာရေး၊ လူမှုရေးစသည့် အခြေခံလိုအပ်ချက်များကို တစ်ပြိုင်နက်တည်း တည်ဆောက်ရသကဲ့သို့ လူသားအရင်းအမြစ် ဖွံ့ဖြိုးတိုးတက်ရေး ဆောင်ရွက်ခြင်းသည်လည်း နိုင်ငံတော်ဖွံ့ဖြိုးတိုးတက်အောင် တစ်ဖက်တစ်လမ်းမှ ဆောင်ရွက် ခြင်းဖြစ်ကြောင်း ပြောကြားသည်။

ဆက်လက်၍ မကွေးတိုင်းဒေသကြီး ဝန်ကြီးချုပ်က အမှာစကားပြောကြားပြီး သင်တန်းသား စံပြဆုရ သင်တန်းသားကိုလည်းကောင်း၊ တိုင်းဒေသကြီး ဝန်ကြီးများက ဘာသာရပ်အလိုက်  ထူးချွန်ဆုရ သင်တန်းသား သင်တန်းသူများကိုလည်းကောင်း၊ ညွှန်ကြားရေးမှူးချုပ်က ဘာသာရပ်အလိုက် သင်တန်းဆင်း လက်မှတ်များကို ပေးအပ်ချီးမြှင့်သည်။

ထို့နောက် သင်တန်းသား သင်တန်းသူများ၏ သင်တန်းဆင်း Project များကို ကြည့်ရှုအားပေးပြီး ထူးချွန်ဆုရ Project များကို ဆုများပေးအပ်ချီးမြှင့်သည်။ အမှတ် (၅) စက်မှုသင်တန်းကျောင်း (မကွေး)အနေဖြင့် သင်တန်းအမှတ်စဉ် (၁၂) ခု ဖွင့်လှစ်၍ သင်တန်းသား သင်တန်းသူ စုစုပေါင်း ၁၈၁၄ ဦးကို အောင်မြင်စွာ မွေးထုတ်ပေးနိုင်ခဲ့ပြီးဖြစ်သည်။

မွန်းလွဲပိုင်းတွင် စက်ပစ္စည်းကြီးကြပ်မှုကော်မတီ၏ (၅/၂၀၂၄-၂၀၂၅) ကြိမ်မြောက် ညှိနှိုင်းအစည်းအဝေးကို စက်မှုဝန်ကြီးဌာန ရုံးအမှတ် (၃၀) အစည်းအဝေးခန်းမ၌ ကျင်းပရာ စက်ပစ္စည်းကြီးကြပ်မှုကော်မတီဥက္ကဋ္ဌ စက်မှုဝန်ကြီးဌာန ပြည်ထောင်စုဝန်ကြီး ကော်မတီအဖွဲ့ဝင်များဖြစ်ကြသည့် ဝန်ကြီးဌာနအသီးသီးမှ အမြဲတမ်းအတွင်းဝန်များ၊ ညွှန်ကြားရေးမှူးချုပ်များနှင့် စက်မှုဝန်ကြီးဌာနမှ တာဝန်ရှိသူများ တက်ရောက်ကြသည်။

ဦးစွာ စက်ပစ္စည်းကြီးကြပ်မှုကော်မတီဥက္ကဋ္ဌ စက်မှုဝန်ကြီးဌာန ပြည်ထောင်စုဝန်ကြီးက အမှာစကားပြောကြားသည်။

ထို့နောက် ဝန်ကြီးဌာနများက တင်ပြသည့် အမှုတွဲများကို သက်ဆိုင်ရာ ကော်မတီဝင်နှင့် ဝန်ကြီးဌာန ကိုယ်စားလှယ်များက ရှင်းလင်းတင်ပြခြင်း၊ စက်ကိရိယာပစ္စည်းစီမံခန့်ခွဲမှုလုပ်ထုံးလုပ်နည်းများ (မူကြမ်း) အပေါ် ကောင်စီဝင်များ၏ ဆွေးနွေးခဲ့မှုများအပေါ် စက်ပစ္စည်းကြီးကြပ်မှုကော်မတီဥက္ကဋ္ဌ ပြည်ထောင်စုဝန်ကြီးက လိုအပ်သည်များ မှာကြား၍ နိဂုံးချုပ်အမှာစကား ပြောကြားခဲ့ကြောင်း သိရသည်။